الجزء الثالث ^__^

في مطار دبي .. واقفين احمد واسماء وبدوووري يتريوون قوم بو احمد اييون من لندن الحين ماباقي شي ويوصلون .. عاد احمد سار ياخذ لهم بوكييه ورد بيستقبلهم به اما اسماء وولدها تموا واقفيين يتريوون ..

بدر: ماااااامااااااا شوفي شوفيييييييييييي هذا يديييي
اسماء: ويييييييين وييييييييييين!!!!!!!
بدر((هالمره فعلا شافهم وويراوي امه )): هذي هاااااااي يدوووه بعد وعموه عفراء وشيماء
اسماء: هيييييييييه صح هذييله هم شفتهم
بدر((يصارخ ..مو مصدق)): يدييييييييييي........ يدووووووووووووو .....عمووووو عفراااااااااا
((وهو يسوييلهم بي بااااااي))
واسماء بعد نفس الشي .. ومن الصوب الثاني بعد عائلة بو احمد شافوهم من تحت وسوولهم بي بااااااي .. سارت اسماء هي وبدوري تزقر ريلها من المحل وتخبره انهم وصلوا
احمد: انزين قوليلي شو رايج في هذا آخذه؟
اسماء: هي هذي حلوه يالله بسرعه فشله يطلعون ومايحصلونا
احمد: اوكي يالله انا بسير احاسب وانتي خذي بدور ونزلوا تحت انا بلحقكم
اسماء: ان شاءا لله
خذت اسماء بدور ونزلوا تحت يتريون قوم بو احمد .. دقايق ونزل احمد وسار عندهم
احمد:هاا بعدهم مايوا؟؟؟
اسماء: لا بعدهم
بدر: ماما .. ماما شوووووفيي هذووووو يدي خليفه
اسماء: هي والله هذيلا هم
احمد مستاااااانس يسوييلهم بي باااااااي .. طلعوا قوم بو احمد وساروا عند احمد وزوجته وولده وشكلهم مستااانسيييييين وخاصة ام احمد الي ولهانه حيل على ولدها وحفيدها
احمد على طووول سار سلم على امه وباسها على راسها .. وبعديين سار سلم على ابوه ومن الصوب الثاني اسماء اتسلم عالبنات وبعدين سارت سلمت على ام احمد ..
والكل اتخبل على بدوووووور قطعوووووه من البووووس وخاصة البنات..
ام احمد:ماتتصوروووون اشقد ولهت علييه
احمد: افاااا امييي بس علييييييه
ام احمد: عليك انت واسماء بعد
احمد: لالا خلاص انا زعلان
ام احمد: ههههه انت لين الحين مايزت من سوالفك
الكل يضحك
بو احمد: يالله يالله كملوا سوالفكم في البيت خلنا نروح الحين فشله جي واققفين جدام الناس
احمد: اوكي يالله خلنا نسير يايب السياره العوده انا
بو احمد: اوكي يالله
في الاستيش الكل مرتبش وضحك وسوالف ..احمد الي كان يسوق بهم وبو احمد كان قاعد جدام واسماء وام احمد وعفراء كانوا يالسين وراء اما شيماء اصرت تقعد بروحها ويا بدوري وراء عشان تبوسه على راحتها وتسولف معاه ..
عفراء: والله وناااسه كان ناقصنا انتوا
اسماء: والله انا كاان خاااااااطري ايي معاكم بس هذا مايابني
احمد: اسمعوا انتوا هاي ... اونه هذا قولي حبيبي .. قولي ريلي .. قولي عمري حياتي عادي ترى لا تستحيين اهلي هاييله
عاد اسماء اهني استحت وماعرفت شو اتقول ومنزله راسها تحت وخدودها صاروا حمر من الحيا
ام احمد: بس عاااد احمد عن المصاخه احرجت البنت
عفراء: هههه هذا من يومه جييه طفس
اسماء((بدلع)): بس عاد عفاااري لا تغلطيين علييه تراني ماارضى
احمد: اااااااااه يا قلبي شو اسوي في عمري انا خلااص بدعم
اسماء: يالله عااااااااااد عن المصاخه
احمد: ان شاء الله تامرين امر انتي
عفراء: عشتوا
احمد: شو ما عايبنج يعني
عفراء: لامب عايبني ((وتطلع لسانها برع))
بو احمد: بسكم بسكم ماتيوزون انتوا..الحمدالله ان جريبين البييت بسير بحط راسي وبرقد
احمد: شو ترقد ابويه الحين الصبح خلنا نقعد نستانس مع بعض
بو احمد: لا بووي استناسوا انتوا انا بسير ارقد تعبان
ام احمد: هي والله انا بعد تعبانه بس برقد ويا ابوك
شيماء: ما عليكم انا وعفراء بنقعد وياكم كنا خامدينها في الطياره
اسماء: خلااص احمد بنقعد مع البنات عاد مشتاقه اعرف اخبارهم واشوف اغراضهم
ام احمد:متى بتلحقين تشوفيين كل هاا ما خلوا شي في لندن ما يابووه
عفراء: هههه لا عاد امي لا تبالغين وايد انا روحي شنطيتييين بسسسس
شيماء: وانا شنطتييين ونص بسس
احمد: ولللللل ما خلو شي وحق حرمتي كم شنطه يبتوا
اسماء: هههههه اسكت فضحتنا
عفراء: هههه خليه يا مرت اخوي لا تحاتي الشنطه الكبيره كلها اغراض حقك وحق مرتك وبدوووري فديت روحه
شيماء: هييييه وكل الي يبناله كان من ذوقي
.................................................. ...
حمد: انزين قولي متى ساير تخطبها
سيف: ماادري يا حمد خايف
حمد: خايف من شووو؟
سيف: ماادري اخاف ما ترضى فيني مثل ما سوت في الي قبلي
حمد: انت لاتخاف وقوي قلبك .. شوف انا بقولك شو تسوي انت اول شي كلم ابوها وشوف شو بيرد عليك بعدين طرش الاهل
سيف: امممم فكره حلوه
حمد: هي يا ريااال بس عاد كبرت لين متى بتتريا انت الحين ماشاءالله حالتك مستقره واذا مارضت الف وحده غيرها
سيف: غيرهاا؟؟؟؟؟؟!!!!!!انا آخذ وحده غير عفراء؟؟؟؟ انت شو اتقول يا حمد اكيد اتخبلت
حمد:هي ليش شو فيها
سيف: انا مااتخيلت عمري مع وحده غيرها لا مستحيييييييييل
حمد:ما عليك انت بس سووا الي قلتلك علييه واذا الله كاتبلك نصيب فيها بتاخذها واذا لااا خلااص
سيف: ان شاء الله تكون من نصيبي..المهم قولي انت شخبارك
حمد: انا والله الحمدالله متلعوز ويا هالاسكان مب طايعيين يعطوني ارض عشان ابني فيه بييت واستقررر انا والحرمه والعيال
سيف: ههههه اونه عيااال الي يقول الحين عشره
حمد:ههههه وشو يعني هالثلاثه الله يخليهم لي باجر بيكبرون
سيف: انزين انت راجعتهم؟؟
حمد: اقولك فوق العشر مرات رايح عندهم ماشي فايده يوعدوني خير بس انا ماشفت منهم شي لين الحين
سيف: يالله ماعليك غيرك اتريوا بالسنييين
حمد: هييه انا وانا شو بيدي اسوي غير اني اتريا ..
سيف: المهم يالله قوم خلنا نسير نتريق يوعاان ..
حمد: يالله ..
ويسيرون حمد وسيف يتريقون..هم ربع من يوم ماكانوا صغارومول مايخشون شي عن بعض دارسيين في نفس الجامعه ونفس التخصص والحين يداومون في نفس المكان ..
.................................................. ....................................
في بيت قوم بو احمد وفي هالصاله الكبيره ..عفراء وشيماء فارشييين اغراضهم ويالسيين يراوون مرت اخوهم شو يابوا من هنااك
اسماء: يا سلااااام هالبدله واايد حلوه لا يقه عليج شيماء
عفراء: انا شريت منها لون احمر ويبنالج لون بنفسجي مثل ما وصانا ريلج قال اي شي بتيبونلها يكون لون بنفسجي
اسماء: هههه فديته عيناوي وانا بعد عيناويه
شيماء: لاااااااا عيوني الوصل وبس
عفراء: والله ما عندكم سالفه..خبريني وين راح احمد؟؟
اسماء: قال بيسير الشركه شوي وبيرد
تطلع ام احمد من الحجره وتشوفهم عافسين الصاله فوق تحت
ام احمد: انتو شو مسويييييييين
اسماء: هلا عمتي حياج قعدي معانا
ام احمد: جي انتوا خليتوا مكان عشان اقعد
عفراء: امي ليش مارقدتي
ام احمد: والله يا بنتي ماياني رقاد ياامي فشيله شلوا هالاغراض وودوا الحجره شوفوهم اخاف ييونا ناس
واول ما خلصت ام احمد كلامها سمعوا صوت الجرس واتسير البشكاره تفتح الباب
ام احمد((تشهق)): ما قلتلكم ..
ميري: ماما .. في حرمه برع تبيج انتي
تسيير ام احمد تشوف منو عالباب
اسماء: اويييي فشله
عفراء: خلها تيلسهم في الصاله الثانيه
ام احمد: هلا والله حياكم الله
ام سيف: الله يحييج يا ام احمد وحمدالله على سلامتكم
ام احمد: الله يسلمج ..عاد اسمحولنا عاالعفسه الي صايره اتعرفين بعد البنات ماصدقول وصلوا البلاد وفتحوا الشنطه يشوفون اغراضهم
ويرورحون البنات ووياهم اسماء يسلمون هلا ام سيف وعايشه..
ام سيف: افا عليج يا ام احمد نحن مب غرب خليهم يستانسون
اسماء:اتفضلوا اهني في الصاله الثانيه
ام سيف : دام فضلج يا بنيتي
عاد ام سيف وام احمد يندمجون بالسوالف والرمسه ويا بعض بس في فرق بين ام سيف وام احمد من ناحيه الشكل مع انهم قد بعض بس عاد ام احمد امبين عليها بنت 25سنه اما ام سيف على عمرها 45..
عفراء((وهي تطالع عايشه من تحت لين فوق وموول ما عايبتنها استايلها ..تبتسم في ويهها عشان ماتبين لها)): شحالج عايشه؟؟
عايشه ((ترد لها الابتسامه)): الحمدالله اشحالج انتي
عفراء:بخير
عايشه: هاا شيماء مستعده حق الجامعه
شيماء: هيي ما خليت شي مايبته من هناك
عايشه: زين سويتي احسنلج .. شو اي جامعه ناويه تسيرين؟؟
شيماء: ان شاء الله جامعة عيمان
اسماء: انتي عايشه شو مسويه مجهزه نفسج للتقنيه والا بعدج
عايشه: لا والله بعدني بس باقي اسبوع ان شاء الحق
شيماء: والله كان خاطري اييج التقنيه
عفراء: لا والله الجامعه احسنلج التقنيه حق الي عالحافه
عايشه((حست انه عفراء يالسه تنغزها)): والله الحمدالله على كل حال انا عايبتني دراستهم وايد ووعدوني اول مابخلص بداوم عندهم
شيماء: والله كشخه
عفراء: شو كشخه انتي الثانيه بعد حق شو تبين تشتغلين الخير وايد الحمدالله
اسماء((تغير الموضوع لانها تشوف انه عفراء مصختها)): الله يوفقج يا عايشه الا قوليلي شخبار اخوج سيف
عايشه((وهي مضايجه وايد من اسلزب عفراء)): الحمدالله بخير
ام سيف: يالله عايشه قومي خلنا انسير الجماعه يبون يرتاحون
ام احمد:لا وين تروحون قعدوا تغدو معانا
ام سيف: لا مشكوره فديتج انتوا ارتاحوا بعد ياايين تعبانيين
ام احمد:حياكم الله بأي وقت
ام سيف: الله يحييج فديتج.. يالله مع السلامه
ام احمد: مع السلامه
 

» الجزء الرابع «

الرئيسية .. جواهر إسلامية .. دروس الفوتوشوب .. مستلزمات .. تقارير .. متنوعة .. زوار الجواهر  .. لمراسلتنا

جميع الحقوق محفوظة © لموقع جواهر الإمارات