الجزء العشرون

في بيت فيصل ..
سالم .. لييين الحين حاقد على اخوه خليفه ومب قادر يسامحه مب قادر كلما يتذكر شو سوا بامه يحقد علييه زياده .. بس بالنسبه لحالته النفسيه اتحسنت اشوي وهذا كله بفضل عادل الي مو مخليه يحتاج شي وكلما حس انه سالم مضايج على طول يرمس وياه ويخفف عنه ..
عبير .. ام فيصل مو مقصره معاها كل يوم اتيي عندها واتيب بناتها عشان يخففون عنها وهي اتحسنت بعد مب شرات قبل وخصوصا بعد ما خفف عليها عادل مسؤولية سالم .. بس الهم الوحيد الي شاغلنها هو اخوها خليفه الي من هاك اليوم ما يرمس وياهم عدل اذا سئلوه يرد عليهم على قد سؤالهم ومرات ما يرد .. ومرات بعد يتفاجئوون انه يالس يصييح شرات اليهال وكله ايقول ابغي امييي وييبولي امي .. الله يعينه على ما بلااه ..

................

في بيت بو سيف ..
ام سيف وعايشه .. فرحانيين وايد بسييف الي باجر بيكون عرسه .. يعني مب عرس الا هي حفله بسيطه بين العائله بس وهذا الي بغته ام سيف عشان ام خليفه الله يرحمها ..
اما سيف ما يعرف يفرح والا يحزن .. لين الحين مب مقتنع انه بياخذ وحده غير عفراء .. ياس يحاول يقنع نفسه انها مب هي الي كانت في الصوره يرد بس ماشي فايده متأكد انها هي ..ينسى كل البنات ولا ينساها .. وبنفس الوقت حاس انه تسرع وايد يوم قال بيتزوج بس الحين مابيده شي لازم يرضى بالامر الواقع وباجر العرس ان شاء الله ..

................

في بيت بو احمد ..
دش عليهم وهوووو مب حاس بعمره الا وذبح عفراء من الضرب واي شي حاولت اسماء انه تبعده بس ماشي فايده تهجم عليها شرات الوحوش لين مايت ام احمد واحمد يسحبونه وفعلا قدروا علييه وام احمد على طول سارت صوب بنتها الي كانت تصييح وترتجف من الضرب الي ضربها بو احمد وام احمد واحمد مب فاهميين شو السالفه .. بو احمد كل دقيقه يردد هالكلام وهو يصارخ ((هذا آخر ثقتنا فييج الشرهه مب عليج علينا احنا الي عطيناج كل هالثقه وخليناج تدشين وتدخلين على كيفج)) احمد وام احمد منصدميين مب عارفين ليش بو احمد جي يالس يقول ليين ما سألته ام احمد .. وقالها كل السالفه .. اهني ام احمد اغمى عليها واسماء وبو احمد انشغلوا ابها اما احمد فكمل على عفراء الضرب .. طلع حرته فيها ياما قال لا تخلونها تطلع بس محد سمعه وبو احمد وام احمد من طبعهم واثقين في عيالهم لدرجه خياليه وفعلا هم قد الثقه الا عفراء الي طلعت غير عنهم من البدايه كانت مغروره وللاسف بسرعه انقص عليها .. والحين ما بيفيد ضربهم لعفراء كم بيضربونها يعني!!!.. لازم يدورون على حل وبسرعه عشان ماتنتشر السالفه بين الناس .. فتموا يتصلون في سعيد بس رقمه مقطوووع!!!!!!.. فاليوم الثاني قرروا احمد وبو احمد يسيرون المحكمه يرفعون عليه قضيه .. والسالفه طولت ايااام وسعييد مب طايع يظهر لهم ليين بعد اسبوع يابوو سعيد واصروا عليه ياخذها طبعا اول شي رفض بس بعد اجباره وضغط بو احمد واحمد الي شويه وبيذبحه من الضرب قرر انه ياخذها وامره للله.. بس بعد ثلاثة ايام من زواجها ردت بيتهم مطلقه .. طلقها سعيد لانه هو ابدا ماحط في باله انه ياخذها ومااستحمل يشوفها هاي زوجته هاي الي امسات ناشر صورها بين الشباب .. شو يضمنله انها ماترمس حد ثاني مثل ما رمسته هو ((وهذا تفكير الاغلبيه طبعا)) .. وهي بعد مااستحملت الضرب الي كان اييها منه .. لدرجة انها ردت البيت والجروح في جسمها وويهها .. شيماء الي بطلت الباب عليها واول ماشافتها اغمى عليها وطاحت فعلى طوول سارت شيماء وزقرت اهلها كلهم .. وودوها المستشفى وقالوا انها سقطت .. يالله الحمدالله انها يت على جيه وهاي رحمة ربها عليها انه طيح الياهل الي ماادري شو كان بيكون مصيره اذا انوجد في هالدنيا .. والحين عفراء بين الناس مطــــلقه .. طبعاالحريم ما هدوا ام احمد الكل يسأل ليش طلقها وشو السبب وهي بعدها ماكملت اسبوع ومن هالكلام يعني وطبعا ام احمد ماتبغي اتخلي العيب على بنتها كله تقول انه الريال ماكان زين وعفراء ماتحملته .. بس للاسف صورتها كانت متداوله بين الشباب واكييد بيوصل الخبر للكل .. واكيد بيقولون انه العيب في عفراء وانها وحده مب زينه ومن كلام الناس .. فعلا هالي صار مع مرور الايام الكل تم يرمس عنها وطبعا كلام الناس غيير الكل قعد يزيد من عمره .. طبعا اهني قوم بو احمد كلهم ماقدروا يقولون شي خلااص السالفه كانت مكشوفه بين الناس .. الكل ابتعد عنهم .. الحريم ماقاموا يزورون ام احمد مووول من بعد ماعرفوا السالفه الا ام سيف يزاها الله خير الي كانت اتواسيها وتقولها انه هذا كلام الناس وما يخلص واكيد عفراء انقص عليها وهي من الداخل اتقول الحمدالله انه سيف ماخذاها .. اما سيف الي ماتهنى بالشهر العسل بعد ماوصله الخبر .. كله مضايج ويرمس ميثه من غير نفس وميثه كانت صابره ومتحمله لانها حاسه بسيف وتعرف انه كان يحب عفراء صح انها كانت ميته من الغيره بس شو بتسوي حاطه امل انه مع مرور الايام بينساها .. وهي اكييد بتحاول وياه لين ما تخلييه ينسى وحده اسمها عفراء .. وشيماء بعد ماتستاهل كل ربعها الي في الجامعه ودروها لدرجة انها كانت مقرره ماتسير الجامعه خلااص وكانت حاقده على عفراء ليش سوت جيه بس طبعا بعد ضغط اسماء عليها وامها وابوها كملت وقالولها انه كلام الناس ما يخلص وانه اهم شي دراستها ..

..................................................

بعد مرور سنتين ..

بيت بو سيف ..
سيف وميثه .. بعد محاولات دام سنه ونص تقريبا من ميثه ليين ما خلت سيف ينسى تماما عفراء .. والحين عااد غير ومحد يتم لحاله سيف يحب ميثه اكثر من حبه لعفراء وكبرت في عينه وااايد لانها كانت متحمله وصابره على تعامله لها صح انها تعبت وشقت بس النتيجه كانت لصالحها .. لدرجة انه حتى وهو يالس في الدوام كل دقيقه يتصل فيها ويطمن عليها وعلى مريوووومه الحلوه الي بعدها ماكملت سنه .. ماشاءالله عليها بيضه وخدودها حمر .. نسخه من امها ميثه بس العيون والحواجب على سيف .. وهي بعد تبادله نفس الشعور زاد تعلقها به وحبها لانها قدرت تغيره صح انه طول بس المهم انها قدرت علييه ..
ام سيف .. الي محد يتخيل اشقد مستانسه هالانسانه يوم تشوف بنت ولدها .. واخيرا شافتها ودوم تحمد ربها انه الله مخلنها لين هاليوم الي تشوف فيه بنت ولدها سيف الغالي الي تعبت وياه لين مااتغير الحين والحمدالله انه عايش حياه سعيده ويا مرته وبنته ..
عايشه .. هالسنه اتخرجت من التقنيه .. وقررت انها تقعد في البيت سنه كامله بعد التعب الي تعبته وبعدين تفكر اذا بتشتغل اولا .. والسبب الثاني عشان تتفرغ حق مريووومه الي امها مااتسوي فيها الي تسويه عايشه .. تشلها وتخليها عندها ومرات ترقدها عندها بعد بس يوم تصيح عاد ولا جنه اتعرفها على طول اتفرها عند امها وميثه .. هههه ومرات ميثه بالعماله تسير توديها عند حجرة عايشه وهي تصيح وعايشه راقده وتعصب على ميثه وتقولها خلااص ما بشلها مره ثانيه صياحه هاي .. بس اليوم الثاني على طول اول مااتنش اتسير ركض صوب حجرة سيف وميثه وتترياهم ينشون عشان اتسير تشل مريووووم ..
وهاي هي عايلة بو سيف الي الحمدالله عايشين في سعاده ومرتاحيين والله يدوم عليهم لانهم شقوا وعانوا كثيرر ..

........................

بو خليفه

خليفه ... اتحسن وصار واحد ثاني بعد ماودوه عند الدكتور النفساني الي خله خليفه يرد شرات قبل بعد عشر جلسات وياه .. يصلي 5 الفروض في المسيد وهذا غير السنه الي يداوم عليها .. ودايما بعد كل صلاه يدعي ربه انه يغفر له على الي سواه بامه ويترحم عليها .. لدرجة انه ما نسى موزه الي بعد كل الي سوتها فيه يدعي لها انه الله يشفيها من الي هيه فيه .. وبعد يومين بتكون ملجته على عايشه الي اصرت عبير تخطبله لاخوها خليفه بعد ماقال انه يبا يتزوج وهي تدري انها ما بتلقى احسن من ربيعتها عايشه حق خليفه .. ونفس الشي سيف وام سيف وافقوا على خليفه وعرفوا انهم ما بيحصلون واحد شراته بعد هالتغيير الي صارله وعايشه بعد رايها من راي امها واخوها ..

سالم .. الي خذ بيت اخته عبير سكن له وقرر انه يسكن عندهم لين ماايمع له بيزتيين ينفعن حق بناء بيت له لانه من شهرين يداوم .. ويوميا يسير بيت ام فيصل عند حبيبة قلبه لانه ملج عليها .. ملج على نوره .. واذا يوم ماشافه جنها سنه وام فيصل ابد ماتقول شي لانها معتبره سالم مثل ولدها .. وقرر انه يسوي عرسه ويا عرس اخوه خليفه لانهم صاروا ربع اكثر من انه يكونون اخوان .. سالم نسى الي سواه خليفه وعرف انه اتغير الحين وخذ جزاه بعد ..

عبير .. الي انزاح عنها الحمل الي كان فوق راسها .. واخيرا ااطمنت على سالم و خليفه وبعد كمن يوم كل واحد بيكون ويا زوجته وهي بتنشغل مع ريلها فيصل ومع البيبي الي بيي في الطريج .. بس لين الحين ماقالت حق فيصل انها حامل لانها امس سارت ويا شذى وقالولها واليوم يالسه تترياه عشان تقوله وتدرييبه بيستااانس .. فأول ما دخل عليها قالها .. الريال طار من الوناااسه وما خلا عبير تتحرك من مكانها ووصى الخدم انهم مايخلونها تتحرك يوم هو مب موجود في البيت واي شي تبييه اييبونلها لين الحجره .. وهاي نقطة الضعف عند عبير ما تقدر تقر مكان واحد بس شو بتسوي لازم تسمع كلام ريلها ..

...................................

بيت بو احمد
واخيرا سكتوا الناس عنهم ونسوا السالفه .. يعني لين متى بيرمسووون لازم بيي يوم ويسكتون .. واليوم كان عندهم الفرحه فرحتيييين ..
اسماء .. واخيـــــــــــــــرا يابت بنوته حلوه واليوم ربت والكل كان عندها في المستشفى ..
احمد .. طااير من الوناسه عشان المولوده اليديده وكل دقيقه يختار اسم عشان يسمونها اياه بس لين الحين ماتفقوا شو بيسمونها
شيماء .. كانت فرحانه بالبنوته .. ولافتتاح العياده الخاصه بها .. لانها صارت الحين الدكتوره شيماء .. وكل ربعها الي ودروها ردولها الحين وعرفوا انه شيماء غير والكل عرف انه عفراء انقص عليها ..
ام احمد وبو احمد .. الي فرحتهم اليوم ما ينوصف .. واخيرا اسماء يابت وحده بعد بدور الي الحين في صف ثاني ابتدائي .. وثاني شي لانه بنتهم استوت دكتوره والحين يقدرون يثبتون للناس انهم عرفوا يربون وانه عفراء انقص عليها ومحد معصوم من الغلط ..

اما عفراء الي ماراحت وياهم المستشفى ومب قادره تسامح عمرها عالي سوته ولا انها تواجه الناس .. كله قاعده في حجرتها .. صح انه اهلها في البدايه ماكانوا يعاملونها شرات قبل وخاصة بو احمد الي ماكان يبا يشوف رقعة ويهها ولا يتكلم معاها بس الحين مب مقصرين معاها دوم يروحون لها الحجره ومرات يطلعونها بالغصب من الحجره .. بس اغلبية وقتها في الحجره ..

تعرفون كيف تقضي وقتها؟؟؟!!!



يا انها تتذكر الماضي وتصيح عليه ..
ويا انها توقف عند الدريشه الي مجابله لبيت قوم بوسيف وتراقب طلعات ودخلات سيف وميثه وبنتهم الي وياهم .. وتتحسف عالي ضيعته من ايدها .. والا حد يرفض ريال مثل سيف .. صح انها تحس بغيره يوم تسمع صوت ضحكاتهم وخاصة انه الي متزوجه سيف هي ربيعتها بس آخر شي تقول الله يهنيهم لانه مابيدها شي تسويه .. هي الي ضيعته من ايدها والا مافي ريال شرات سيف .. والحين يالسه في بيت ابوها مطلقه ومااعتقد انه في حد بيقرب صوب بيتهم بعد ماسمعوا عنها .. صح انهم عرفوا انها انقص عليها بس بعد الناس بيدورون على وحده مايكون عليها شي والبنات كثار .. وعفراء خلااص هذا مصيرها .. وهذا الي الله كاتبه لها .. بس الله واعلم شو بيستوي في المستقبل ..

النهــــــــــــــــــــــايه^____^
 

الرئيسية .. جواهر إسلامية .. دروس الفوتوشوب .. مستلزمات .. تقارير .. متنوعة .. زوار الجواهر  .. لمراسلتنا

جميع الحقوق محفوظة © لموقع جواهر الإمارات