|
الجزء الرابع عشر
في بيت قوم بوسيف .. ام سيف كالعاده قاعده في الصاله وعايشه وياها
لانها ماسارت الكليه اليوم لانها العاده تسير ويا عبير وعبير اليوم ما
داومت .. وسيف قدم على اجازه من اليوم لمدة اسبوعين لانه حالته النفسيه
ما تسمح له انه يداوم .. وطبعا يالس في حجرته ..
ام سيف: شفتي عمايل اخوج يا بنتي ساير ماخذله اجازه من الدوام انا
الحين قلت بيروح الدوام ويقعد هناك مع ربعه يغير جو ويصير زين الحين
حتى الدوام ما يبا يروحله
عايشه: ما عليه امي انتي لا تسوين في نفسج جي انا بسير اكلمه عن
الموضوع الي قلتلج اياه امس
ام سيف: لا لا مافي داعي ما بيرضى انا متأكده
عايشه: ما عليه امي بنجرب ما بنخسر شي
ام سيف: خلااص سيري كلميه انتي
تسير عايشه صوب حجرة اخوها وتدق الباب .. طبعا كالعاده .. لا جواب ..
بس بعد مرور دقايق يفتح الباب
سيف: نعم
عايشه: اممم ممكن ادخل
سيف: تعبان ابغي ارقد
عايشه: انزين ما بطول وياك انا بقولك كلمتين وبروح
سيف: دخلي
عايشه: شحالك اخوي وشخبارك
سيف: خلصيني شو تبين
عايشه: اممم ليش ما رحت الدوام اليوم
سيف: اووهوووو بترمسين والا اطلعج برع
عايشه: لالا خلااص برمس بس ماابغيك تعصب وابغيك اتكون هادي .. اممممم
شو رايك نوديك المستشفى
سيف: ليش شو شايفتني مريض
عايشه: هي الصراحه انت مريض يا سيف ولازم تسير مستشفى الامراض النفسيه
سيف ((وهو يصارخ)): امراض نفسيه يا عاشوو!!!!!!! شو شايفتني مينوووووون
طلعي برع من حجرتي طلعي برع
عايشه: انت هدي اعصابك يا سيف الله يخلييك هالمستشفى مب حق الميانيين
حق الي حالاتهم مثل حالتك انت مو ملاحظ انك متغير يا سيف
سيف: لو يبتي هالطاري على لسانج مره ثانيه صدقيني يا انا في البيت ويا
انتوا
عايشه: الله يخليك يا سيف افهمني انا وامي ما نبي نخسرك نحن مالنا غير
الله وغيرك في هالدنيا وهالمستشفى ما بيخلونك عندهم بيخلونك تسير على
فترات صدقني ما بتندم لو سمعت كلامي
سيف: عاشووو لو سمعت منج كلمه زياده بطلع من البيت ولا برد منه
عايشه ((بخيبة امل)): خلااص خلااص طالعه
تطلع عايشه من حجرة اخوها وتصك الباب وراها وتسير الصاله تشوف امها ويا
ميثه قاعدين ..
عايشه: اوووه ميثوو عندنا اشحالج
ميثه: تماام انتي اشحالج يالقاطعه
عايشه: هههه الحمدالله .. شو اسوي اتعرفين بعد كليه وعوار راس
ميثه: هي صح ليش مو مداومه اليوم
عايشه: ترى ربيعتي ما داومت وانا اروح وارد وياها فقلت بغيب اليوم ومن
باجر بخلي الباص اييني ويردني
ميثه: ليش اخوج سيف مايوديج واييبج
عايشه: يعني ما تعرفين يا ميثه ما يحب يطلع موول هالولد
ام سيف: هي صح قوليلي شو قالج
عايشه: رفض طبعا ياامي وقال اذا مره ثانيه طريتوا هالشي بيطلع من البيت
ولا بيرد منه
ميثه: جي شو قلتوله
عايشه: انا قلت نوديه مستشفى الامراض النفسيه يمكن يتغير اشوي ويرد
شرات قبل بس ماشي فايده يا ميثه
ميثه: الله يعينه ويعينكم الصراحه وهاي عفراء الله ما بيسامحها على الي
سوته
عايشه: الله ياخذها ماادانيها خلها تقعد لين ما يشيب شعر راسها
ام سيف: بسسس يا عايشه عيب الكلام الي تقولينه ..سامحينا يا ميثه عايشه
لسانها متبري منها
ميثه: لا خالوو عادي انا لو كنت مكان عايشه بسوي اكثر عن جيه وعفراء
خلااص ما قمت اروح لها وايد ولا اتصل فيها وهي بعد نفس الشي يعني
علاقتي معاها شبه مقطوعه وهي الي تغيرت علي مره وحده مب انا
ام سيف: الله يسامحها يا بنتي
...................................
في بيت قوم بو خليفه .. وشعور ام خليفه وهي واقفه
عند الباب ما ينوصف من الفرحه .. حضنته وباسته وهوو بعد نفس الشي يلسته
في الصاله وهي سارت تزقر عبير ..
ام خليفه: عبييييييييير تعالي عندي لج مفاجأه
عبير: امييي مالي خلق حق شي
ام خليفه: انتي تعااااالي وصدقيني ما بتندمين
تنش عبير تفتح الباب ..
عبير: ها امييي
ام خليفه: تعالي شوفي منو يالس في الصاله
تسير عبير ويا امها واول ماتشوفه تشهق وتتسير تحضنه على طوووول ..
عبير: فديييييييييييييييتك والله اني متوله عليك يا اخوي
سالم: هههه انا اكثر والله بس مو جنج محلوه عبيروووو
عبير: ههه احم احم جان اتفجج فديتك عيونك الحلوه انت الي محلو مب انا
بس الحمدالله انك مو مستوي شرات العنجريز هههههه
سالم: ههههههههههه حلوه هاي العنجريز
ام خليفه: ويييي قطع بعيد الشر عن ولدي قولي فديتك كنت تاكل زين تنام
زين
سالم: ههههههه امي هي اشفيج انتي
عبير: ههههه لا تلومها يا سالم خلااص الحين هالفتره الي بتم فيها
بتنسانا كله بتهتم فيك
ام خليفه: هي فدييته سنه غايب عني وجنه دهر عاد جان زين يتم عندي
ومايروح للابد
سالم: لا اميي اسبوعين بقعد عندكم وبروح
عبير: وييي اسبوعين ما يكفون
سالم: شو اسوي المهم انا الحين بسير اتسبح وارتاح شوي وبييكم عقب ابغي
اعرف اخبار البيت كله من سافرت لين الحين
ام خليفه: هي سيرارتاح فديتك
سالم: الا خليفه وين
ام خليفه: خليفه في الدوام
سالم: هييه بس ايي بسلم عليه عيل خلاص انا خليكم الحين
عبير: اوكي فديتك سير ولا تبطي علينا تراني اترياك لين ماتخلص
سالم: اوكييييك
..............................
الظهر في بيت قوم بو احمد وبعد ما خلصوا غدا
كانوا قاعدين كلهم راشد ومريم واحمد واسماء وبدور ما عدا عفراء الي
ماقامت تيلس وياهم وايد ..
ام احمد: هاا امي فديتج شو الجامعه وياج
شيماء: لا الحمدالله الحين اوكييه وناسه مسويتلي شله بس الدراسه صعبه
امي
اسماء: ما عليه انتي تدرسين طب يعني لازم بيكون صعب انتي بس شدي حيلج
ولا تخافين
ام احمد: هي اميي نبا نشوفج دكتوره
احمد: هههه الله يعين الخلق اذا هاي دكتوره بتستوي
اسماء: ههههههه اشفيك انت الحمدالله انها مالها خص في اجسامهم بي
اسنانهم
احمد: ههههههه هي تراني انا احاتي اسنانهم حلييلهم والله بعدين
بيكتوبون في الجرايد اسنان شعب دولة الامارات تبدأ بالتساقط
اسماء: ههههههههههه بس حرام عليك
شيماء: مااالت عليكم انزين ابووووي شوفهم
بو احمد: مالكم خص في بنتي انتي وياه ما عليج منهم باجر بيترجونج
تعالجين اسنانهم
ام احمد: هي والله وانت الصاج
احمد: ههههههههه لا حشاا انا كل شي ولا اسناني عاد مااضمن اسير عندها
شيماء: اصلا انا ماابغيك اتي انزين
بو احمد: عيل عفراء وين يا مريم تعرفين اني انا من ثلاثة ايام الحين
ومب شايفتنها
ام احمد: والله ما ادري شو بلاها هالبنت ماقامت تيلس ويانا وايد
اما عفراء يالسه في حجرتها وحاطه السماعات في اذنيها وقاعده ترمس
حبيبها سعيد ويتفقون على اليوم ..
سعيد: عيل انتي تعالي بسيارتج وانا بسيارتي شو رايج
عفراء: خلااص اوكي حبيبي
سعيد: ااااه متى بيستوي الوقت مايمر بسرعه افففف
عفراء: وانا اكثر منك والله متشوقه حق هالوقت
سعيد: يا بعد عمري والله
تسمع عفراء صوت دقات الباب ..
عفراء: اقوول سعيد لحظه
سعيد: اوكي
وتنش عفراء تبطل الباب
عفراء: هاا اميي
ام احمد: شو اتسوين انتي ليش ما قمتي تيلسين عندنا وايد شو استوابج
عفراء: اوووه امي ايلس عندكم شو اسوي
ام احمد: تعرفين انه ابوج يسأل عنج دوووم
عفراء: افففففف بيي الحين
ام احمد: يالله بسرعه ..
تصك عفراء الباب وتشيل التلفون ..
عفراء: اقوول سعيد انا بتصلك عقب الاهل يبوني
سعيد: خلااص اوكي
عفراء: باي حبيبي
سعيد: باي
وتنزل عفراء تحت تقعد وياهم بس تفكيرها كله في سعيد ....
......................
في بيت قوم بو خليفه كانوا يالسين عبير وسالم وام خليفه في الصاله ..
ام خليفه ذبحت ولدها بالاسئله شو كنت تاكل وشو كنت اتسوي هناك وكيف كنت
عايش ..... الخ ..
سالم: اميييي اشفيج انتي والله اني كنت مرتاح هناك بس الشي الوحيد اني
كنت وايد متوله عليكم
عبير: امييي انتي مول ما خليتيني ارمس من اسئلتج
ام خليفه: شو اسوي والله ولدي ومن حقي اسئله
سالم: ههههه هي بس مب جيه ذبحتيني ..
بعد ما يخلص سالم كلامه يدش عليهم خليفه ..
خليفه: سلام عليكم
الكل: وعليكم السلام
ينش سالم عشان يسلم عليه وفرحان من يشوف اخوه
سالم: هلا والله خليفه هلااااا اشحالك والله تولهت عليك يا اخوي
خليفه: انا زين انت متى ييت
سالم: الصبح واصل
خليفه: اقولج انتي اييه يودي المهر وخليه عندج خشييه والعرس بعد ثلاثة
ايام .. عم فيصل يبا يسافر فقال لازم يجدم
العرس عشان عمه يكون موجود ..
ويروح عنهم خليفه ويدش داخل
سالم: اوووووووووووووه عبيروووو بتعرسييين وماتقولين لي مبرووووك
عبير: امييي اشفيه هذا جنه على كيفك وزين يمدني اسوي كل شي بهالثلاثة
ايام
ام خليفه: شو اسوي يا بنيتي انا خلاص تعبت ويا هالولد حتى كلمة اشحالج
ماسمعت منه
سالم: امي شو بلاه خليفه حتى انا حسيت انه متغير علي ..وانتي ياعبير
اشفيج جنج مغصوبه عالعرس؟؟
عبير: لا مافيني شي يااخوي انت لا تحاتي بس انا قلت يعني اني بكمل
دراستي والريال ما يباني اكمل
سالم: لا والله وليش ما يباج تكملين جي على كيفه هوو
عبير: ما عليه يا سالم خلااص انا راضيه
سالم: عبير فديتج لو انتي مب مقتنعه في هالزواج لا توافقين ترى هاا
زواج مب لعب يهال
عبير: لا سالم مقتنعه..وهي في خاطرها تقول ((ليتك يا سالم سمعت كلام
خليفه وتهديده لي جان ما قلت هالكلام))
سالم: يالله عاد استانسي بتعرسين مالحقتي تقعدين عندي اشوي الا قوليلي
المعرس من وين وكم عمره
عبير: عمره 25 ومن دبي
ام خليفه: وييي من دبي والله مب متخيله بنتي تعيش بعيده عني
سالم: ما عليييه امي انا وياج
ام خليفه: انت اسبوعين وبتودرني بعد
عبير: لا تحاتيين ياامي انا كل يووم بييج
ام خليفه: ويي درب من دبي لين عيماان كل يوم اتين
سالم: ما عليج يا امي في الفتره الي بكون فيها انا موجود بوديج عندها
يوم وهي خلها اتينا يوم
عبير: هي والله زين تسوي يا سالم
...................................
فيلليل .. في
ارقى مطعم والعزيمه اليوم على عفراء.. كانوا
يالسين هي وسعيد بعد ما طلبو لهم اكل ..
سعيد: انتي ملاك يا عفراء
عفراء: ههههه بس يا سعيد من يلسنا وانت تتطالع فيني تراني استحي جييه
سعيد: فديييت الحيا عليج
عفراء: انزين سعيد كلمني عنك
سعيد: امم شو اقولج انا واحد ولد اكبر تاجر وانا اكبر واحد من اخواني
وخواتي .. وماادوام بس اسير مرات الشركه
اساعد الوالد في الشغل .. امم الكل اول ما
يشوفني يقول اني خقاق لاني مااعطي ويه حق حد ووايد بنات حاولوا يتقربون
مني بس اناا ما عطيتهم ويه الا انتي جذبتيني الصراحه
عفراء: يا بعد عمري يا سعيد الله لايحرمني منك
سعيد: ولا منج غناتي
وايي الجرسون ويحط الاكل على الطاوله ..
سعيد: امممم عفراء ممكن اقولج شي بس ارجوج ماابغيج تنفعلين وتفهميني ..
عفراء: اتفضل قول ..
يا ترى شو الي يبا يقوله سعيد؟؟؟؟!!!!!!!!
بتعرفون في الاجزاء اليايه ^_^
»
الجزء الخامس عشر
« |
